Umiartortunngorniarluni umiarsuarmut ilinniarfiusumut Georg Stage-mut ilinniartunngorsinnaagaanni piumasaqaatit

Umiartortunngorniarluni umiarsuarmi ilinniarfiusumi Georg Stage-mi qaamiutut- igasutulluunniit tunngaviusumik ilinniarnermut ilinniartunngussagaanni, minnerpaamik 9. klassimi atuarsimanermut uppernarsaat pigineqassaaq, umiarsuarmi angalanerup aallartinnerani 17 ½-nik ukioqalereersimassalluni nalinginnaasumillu 22 sinnerlugit ukioqassanani.

Ilinniartunngorniarlutik qinnuteqartut sanaassanik ilinniarnermi naammassisimasutut allagartallit (svendebrev) tunngaviusumik ilinniartussarsiarineqarsinnaanngillat. Ilinniartunngorniarlutik qinnuteqartut sukkornermik nappaatillit (sukkersyge) noqartarnermilluunniit (epilepsi) nappaatillit ilinniartussarsiarineqarsinnaanngillat, taamatullu aamma umiartortunngorniarluni umiarsuarmi ilinniarfimmi Georg Stage-mi nalinginnaasumik ilinniartussat pillagaasimanermut allagarserneqarsimassanngillat pissusilersornermikkuulluunniit ajornartorsiuteqartuussanatik.

Ilinniartussarsiarineqarneq pisarpoq aalajangiigallarnikkut, ilinniartunngorniarluni qinnuteqartoq peqqissutsimut uppernarsaammik allaassutaasunik nalunaarsiffigisimanngitsumik takutitaqarneratigut (ataatungaani allassimasut takukkit). Umiartortunngorniatut umiarsuarmi ilinniarfimmi qaamiutut ilinniartuusinnaassaguit qinertuusinnaasutut allagartaqassaatit, tassa imaappoq, qalipaatinik immikkoortitsisinnaassanngilatit isigiarsuttuuvallaassanallu.

Georg Stage-mi ilinniartuuniarlutik qinnuteqartut tunngavilersuutit arlaqartut tunngavigalugit nalilersorneqartarput, ilinniartunngorniartulli imarsiornerup iluani ingerlalluarnissamik kissaateqartut siullertut salliutinneqartarlutik.